الرئيس عبدالفتاح السيسي
قال الرئيس عبدالفتاح السيسي، في كلمته أثناء تفقد قوات التدخل السريع المحمولة جواً ذات التشكيل الخاص، اليوم، الخميس، إنه لديه يقين من الله بأنه سينصر مصر، مشيرا إلى أن البلاد في صراع مع الوقت والزمن، وقال: "بفضل الله إحنا منصورين".
السيسي قال: "كان لازم أجي النهاردة عشان أطمئن عليكم وأسعد كمان باللي أنا شفته النهاردة، عايز أقول للقوات اللي موجودة قدامي أنتم بالذات لازم شعاركم يبقى مختلف، شعار قوة التدخل السريع مختلف، ونستمد من الشعار أسلوبنا يعني أداءنا يعني كفاءتنا، وبقول له كن قويا كن قادرا كن كفئًا كن مستعدًا".
وأضاف: "ليه محتاجين ده؟ طيب القوات المسلحة لازم تكون شغالة في الصفات دي، ده صحيح، لكن قوة التدخل السريع أكثر جاهزية وأكثر استعدادًا لأن رد الفعل لقوة التدخل السريع يمكن مش بالأيام ولا الساعات يمكن أقل من الساعات".
وتابع: "إحنا موجودين عشان نحمي بلدنا وحدودنا، ولو الأمر تتطلب حاجة تانية نبقى قادرين وجاهزين وبقول لينا كلنا لازم قوات التدخل السريع في أعلى الجاهزية وأعلى مستوى من الكفاءة القتالية، وأنا عارف إن أنتم بتبذلوا جهد كبير دلوقتي بالذات في كل حتة بس القوات المسلحة لازم تكون دايما في طليعة أجهزة الدولة ومؤسسسات الدولة في كل شيء عشان إحنا محتاجين الجهد ده، ومحتاجين الأداء ده وكمان معاه الإخلاص، وكمان معاه الأمانة وكمان معاه الشرف".
وقال: "دي صفات موجودة جوانا كلنا كمصريين، لكن كمان لازم تبقى موجودة بشكل مبالغ فيه في الجيش اللي بيحمي مصر والناس اللي مستعدة تضحي بنفسها عشان خاطر بلدها مصر.. أنا بشكركم وبوصيكم شوفوا وبصوا حواليكم كويس، الكلمة دي بقولها لنفسي وللقوات المسلحة والشرطة ولكل المصريين من فضلكم عايزين ننتبه لبلدنا ونحافظ عليها، مش عشانا إحنا بس، عشان إحنا وخاطر أبنائنا والأجيال القادمة".
وأضاف: "مستعجلين شوية أيوة صحيح عشان إحنا في صراع مع الوقت والزمن، ولازم نكون متأكدين إننا بفضل الله إحنا منصورين، متأكدين وعندنا يقين إن ربنا سبحانه وتعالى هيساعدنا، ببساطة خالص إحنا بنتكلم على بناء وعلى تعمير وبنتكلم على إصلاح يعني لا نبغي الفساد والآية بتقول إن الله لا يحب المفسدين يبقى عكسها إن ربنا يحب المصلحين وإحنا إن شاء الله بنصلح، واطمنت وكنت مطمن واطمنت أكتر".
واختتم حديثه بقوله: "ربنا يحفظكم ويحفظ جيش مصر وشرطة مصر ويحفظ مصر كلها، اللهم آمين، متشكرين".
كن أول شخص وأضف تعليق على هذا الخبر الآن!